കുവൈറ്റിലെ അൽ ജഹ്‌റയിൽ വൈദ്യുതി ബന്ധം നിലച്ചു; ട്രാൻസ്ഫോർമർ സ്റ്റേഷൻ തകരാറിലായതായി മന്ത്രാലയം

കുവൈറ്റ് :(gcc.truevisionnews.com)  കുവൈറ്റിലെ അൽ ജഹ്‌റ ഗവർണറേറ്റിലെ പ്രധാന ട്രാൻസ്ഫോർമർ സ്റ്റേഷൻ തകരാറിലായതിനെത്തുടർന്ന് മേഖലയിലെ വിവിധ ഭാഗങ്ങളിൽ വൈദ്യുതി ബന്ധം നിലച്ചു. ശനിയാഴ്ച രാത്രിയോടെയാണ് സംഭവം നടന്നതെന്ന് കുവൈറ്റ് വൈദ്യുതി, ജലം, പുനരുപയോഗ ഊർജ മന്ത്രാലയം അറിയിച്ചു. അൽ ജഹ്‌റയിലെ പ്രധാന ട്രാൻസ്ഫോർമർ സ്റ്റേഷൻ പ്രവർത്തനരഹിതമായതാണ് പെട്ടെന്നുള്ള വൈദ്യുതി തടസ്സത്തിന് കാരണമായത്. അൽ ജഹ്‌റ ഗവർണറേറ്റിലെ പരിമിതമായ ചില ഭാഗങ്ങളിലാണ് വൈദ്യുതി വിതരണം തടസ്സപ്പെട്ടതെന്ന് ഔദ്യോഗിക വാർത്താ ഏജൻസിയായ കുന റിപ്പോർട്ട് ചെയ്തു.

വിവരം അറിഞ്ഞ ഉടൻ തന്നെ മന്ത്രാലയത്തിന്റെ എമർജൻസി ടീമുകൾ സ്ഥലത്തെത്തി അറ്റകുറ്റപ്പണികൾ ആരംഭിച്ചു. വൈദ്യുതി ബന്ധം എത്രയും വേഗം പുനഃസ്ഥാപിക്കാനുള്ള ശ്രമങ്ങൾ യുദ്ധകാലാടിസ്ഥാനത്തിൽ നടന്നു വരികയാണ്. സാങ്കേതിക തടസ്സം പരിഹരിക്കാൻ ശ്രമിക്കുന്ന ഉദ്യോഗസ്ഥരുമായി സഹകരിക്കുന്നതിനും സാഹചര്യം മനസ്സിലാക്കുന്നതിനും അധികൃതർ ജനങ്ങളോട് നന്ദി അറിയിച്ചു. ഇറാൻ-ഇസ്രായേൽ സംഘർഷവുമായി ബന്ധപ്പെട്ട അവശിഷ്ടങ്ങൾ വീണ് കുവൈറ്റിലെ ചില പവർ ലൈനുകൾക്ക് നേരത്തെ കേടുപാടുകൾ സംഭവിച്ചിരുന്നുവെന്ന റിപ്പോർട്ടുകൾക്ക് പിന്നാലെയാണ് ഈ സംഭവം.

Power outage in Al Jahra, Kuwait; Ministry says transformer station damaged