(gcc.truevisionnews.com) സുതാര്യത ഉറപ്പാക്കുന്നതിനും നിരീക്ഷണ സംവിധാനങ്ങൾ ശക്തിപ്പെടുത്തുന്നതിനുമായി പൊതുമേഖലയിലെ ചില ഉദ്യോഗസ്ഥർക്ക് നിയമപാലനത്തിനുള്ള അധികാരം നൽകുന്ന പുതിയ പ്രമേയം ദുബായ് ഭരണകൂടം പാസാക്കി. നിയമവിരുദ്ധ പ്രവർത്തനങ്ങൾ കണ്ടെത്താനും അവ റിപ്പോർട്ട് ചെയ്യാനും സമൂഹത്തെ പ്രോത്സാഹിപ്പിക്കുന്ന പദ്ധതിയുടെ ഭാഗമായാണ് ഈ നടപടി.
നഗരത്തിലെ സുരക്ഷ വർദ്ധിപ്പിക്കുക, ജനങ്ങൾ നിയമം പാലിക്കുന്നുണ്ടെന്ന് ഉറപ്പുവരുത്തുക, ആധുനികവും സുസ്ഥിരവുമായ വികസന കാഴ്ചപ്പാടിനെ പിന്തുണയ്ക്കുക എന്നിവയാണ് പുതിയ നീക്കത്തിലൂടെ ലക്ഷ്യമിടുന്നത്. പ്രത്യേക പരിശീലനം ലഭിച്ച ഉദ്യോഗസ്ഥർക്ക് തങ്ങളുടെ അധികാരപരിധിയിൽ നിയമലംഘനങ്ങൾ തടയാനുള്ള പ്രത്യേക ചുമതലയും ഇതോടെ ലഭിക്കും. ദുബായിയുടെ സുസ്ഥിരമായ നഗര മാതൃകയെ ശക്തിപ്പെടുത്തുന്നതിനും നിയമവാഴ്ച കർശനമാക്കുന്നതിനും ഈ പ്രമേയം സഹായകമാകുമെന്ന് അധികൃതർ വ്യക്തമാക്കി.
ദുബായ് ഒന്നാം ഡെപ്യൂട്ടി ഭരണാധികാരിയും യുഎഇ ഉപപ്രധാനമന്ത്രിയും ധനമന്ത്രിയും ദുബായ് ജുഡീഷ്യൽ കൗൺസിൽ ചെയർമാനുമായ ഷെയ്ഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂം ഈ ആണ് ഉത്തരവ് പുറപ്പെടുവിച്ചിരിക്കുന്നത്. ദുബായുടെ നഗര പരിസ്ഥിതി സംരക്ഷിക്കുന്നതിനും വൃത്തിയുള്ളതും ആകർഷകവും ഉയർന്ന ജീവിതനിലവാരമുള്ളതുമായ ഒരു നഗരമെന്ന നിലയിൽ ദുബായുടെ തുടർച്ചയായ വളർച്ചയെ പിന്തുണയ്ക്കുന്നതിനും സർക്കാരും സമൂഹവും തമ്മിലുള്ള സഹകരണത്തിന്റെ പ്രാധാന്യത്തെ ഈ തീരുമാനം അടിവരയിടുന്നു.
ഈ പ്രമേയത്തിന് കീഴിൽ, നിയമപാലന അധികാരം നൽകിയിട്ടുള്ള ഉദ്യോഗസ്ഥരുടെ സേവനം ദുബായ് മുനിസിപ്പാലിറ്റി സജീവമാക്കും. ഇതിനായി 'ഇൽതിസാം' (Eltizam) എന്ന സ്മാർട്ട് പ്ലാറ്റ്ഫോമാണ് അവർ ഉപയോഗിക്കുക.
ദുബായുടെ സൗന്ദര്യത്തെയോ പൊതുസ്ഥലങ്ങളെയോ ദോഷകരമായി ബാധിക്കുന്ന പ്രവൃത്തികൾ റിപ്പോർട്ട് ചെയ്യാനും രേഖപ്പെടുത്താനും ചില സർക്കാർ ഉദ്യോഗസ്ഥരെയും പൊതുജനങ്ങളെയും ഈ ആപ്പ് അനുവദിക്കുന്നു. റിപ്പോർട്ടിംഗ് സംവിധാനം വ്യക്തവും സുസംഘടിതവുമായി നിലനിർത്തുന്നതിനാണ് ഇത് രൂപകൽപ്പന ചെയ്തിരിക്കുന്നത്.
Content Highlight: Dubai passes new resolution to include public sector officials in law enforcement
